Storieboeke vir Helpende Hand
Boeke, boeke en nogmaals boeke. Niemand wil van sy geliefde leesstof ontslae raak nie, maar soms noodsaak ‘n TREK dat daar by die nuwe blyplek eenvoudig nie genoeg plek gaan wees nie.
Lidmate van die Gereformeerde Kerk Brackenhof het besluit om opruiming te hou en is kartonne vol boeke bymekaar gemaak. En hoera, nou is daar eweskielik baie lesers wat hierby gaan baat. En ‘n nog groter hoera, nou is daar weer oop pakplek op die boekrak om nuwe leesstof te bêre!
Judi van Helpende Hand het ons boeke kom afhaal en by verskillende plekke gaan uitdeel. Judi stuur ook landswyd boeke deur middel van Paxi van Pep Stores na ouetehuise en ander instansies. Dankie, Judi, vir jou hulp.
Indien enigiemand boeke wil skenk, kontak gerus die kerkkantoor.
En aan Freddy en Carla wat die boeke bymekaar maak, baie dankie!
